PROGRAMA PNDS 2026 SEI KONSTRUI DAPUR MERENDA ESKOLAR EBC No 4 KULUHUN
KULUHUN, 16 ABRIL 2026 – Iha tempu besik sei halo konstrusaun ba Dapur Merenda Eskolar iha eskola EBC No 4 Kuluhun liu husi Programa Nasional Dezenvolvimentu Suku (PNDS).
Ba Sentru Informasaun Suku Dijital Kuluhun, Kinta (16/04) semana ne’e, Xefe Suku Kuluhun, Deus Dado Martins hateten programa PNDS ba tinan ida ne’e, Suku Kuluhun hetan oportunidade atu halo Konstrusaun ba dapur merenda eskolar iha Eskola EBC No. 4 Kuluhun.
“Tinan-tinan ita iha suku hetan, foin dadaun iha tinan 2025 nian maka ita la hetan tanba iha empedementu husi ita nia komunidade maibe ba tinan 2026 ita hetan oportunidade ida programa PNDS tinan ida ne’e ita hetan atu halo dapur merenda escolar ba ita nia eskola EBC Kuluhun nian, para ba ita nia oan sira merenda escolar han iha fatin ne’e” tenik Xefe Suku.
Xefe Suku ne’e hateten kada tinan suku kuluhun hetan orsamentu ba programa suku nian hamutuk rihun ha’at nulo bazeia ba dadus ne’ebe maka submete ba programa PNDS.
“Iha PNDS, kada tinan ita nia osan tama iha konta suku nian provolta quarenta mil maibe bazeia ba dadus sira ne’ebe ita foti karik hanesan ohin hau mensiona katak iha 2027 sei halo Konstrusaun ba aldeia rua ninian maibe ba tinan 2026 nian maka agora ita halo ona ba dapur merenda escolar, entaun orsamentu sempre tama la a’as liu maibe osan tama kadaves tu’un mai iha Viente sinco e mil”, dehan Deus.
Xefe Suku ne’e haktuir iha tempu badak sei loke prosesu tenderizasaun ba kompanha sira ne’ebe kompleita na dokumentus.
“Agora dadaun rua maka submete dokumentus mai provolta iha lima ona, ne’ebe ita hein tenderizasaun sei loke iha tempu badak”, Deus hateten.
Tanba ne’e Autoridade Suku ne’e husu ba Timor-oan sira ne’ebe kaer kompania liu-liu iha suku kuluhun nian, bele hola parte mos iha tenderizasaun ne’e.
“Hau husu ba kompania Timor oan sira liu-liu suku kuluhun iha aldeia hitu, ita bo’ot sira karik kaer projeitu liu sai husi suku kuluhun por favour ita bo’ot sira hakbesik a’an mai iha suku kuluhun para foti formulario priense para bele tuir kompete atu hadia ita nia suku”, tenik Xefe suku.
Tuir Xefe Suku kada tinan kompania sira ne’ebe se’es husi suku kuluhun maka kompete tanba ne’e husu ba Timoroan sira iha suku kuluhun nian atu partisipa hodi kompete ba projeitu sira ne’ebe iha suku laran.
Hakerek : Equipa Formador JPD DNDM SEKOMS
