ESTABLESEMENTU SUKU DIJITAL, FASILITA KOMUNIDADE ASESU BA INFORMASAUN
KULUHUN, 16 ABRIL 2026 – Sekretaria Estado ba Komunikasaun Sosial establese Sentru Informasaun Suku Dijital iha Kuluhun nu’udar meius ida hodi fasilita komunidade sira asesu ba informasaun suku.
Xefe Suku Kuluhun, Deus Dado Martins ba Ekipa Sentru Informasaun Suku Dijital Kuluhun, Kinta (16/04) semana ne’e hateten Estrutura suku Kuluhun sente orgulhu ho establesementu Sentru Informasaun Suku Dijital tanba bele fo sai informasaun konaba atividades suku nian iha Kuluhun.
“Hau hanoin ida ne’e buat ida que orgulhu tebes – tebes ba estrutura suku Kuluhun nian tanba ita bele hetan tan buat ida ne’ebe que diak para ita bele partilha informasaun ba ita nia sidadaun sira hotu”, dehan Xefe Suku Kuluhun
Lider maximu suku Kuluhun ne’e garante katak durante nia mandatu sei tau matan no asegura nafatin ekipamentus sira ne’ebe maka iha hodi fasilita informasaun ba komunidade sira iha Kuluhun.
“Hau nia mandatu ou bele mos iha Xefe suku seluk nia mandatu, hau espera katak ami sei kuidadu sasan ida ne’ebe que estadu tau iha suku ida ne’e no mos ba ami nia komunidade iha suku kuluhun iha aldeia hitu (7) hotu – hotu bele asesu kualker atividades”, Tenik Xefe Suku
Xefe Suku ne’e hatutan, suku Kuluhun iha Aldeia hitu no iha atividades balun maka halao hanesan limpeza jeral kada sesta-feira iha suku no aldeia sira, ho atividades hirak ne’e bele fo’o sai liu husi Sentru Informasun Suku Dijital ne’ebe establese ona iha Suku laran atu nune’e komunidade Kuluhun bele hatene.
“Sesta – sesta ami limpeza kada aldeia para ida ne’e ami bele fo’o nafatin informasaun liu-liu ba joventude, ferik katuas sira para sira mos bele hatene konaba informasaun kualker atividades ruma iha suku”, Deus hateten
Konaba ekipametus ne’ebe atu apoiu servisu iha sentru informasun suku dijital Kuluhun, Xefe Suku ne’e hateten iha ona ekipamentus balun hanesan Laptop no telemovel ida.
Iha sorin seluk Xefe Aldeia Sorumutu ba Dame, Emilia Gradiana Bou hateten nu’udar autoridade lokal sira sente kontente tanba iha Suku Kuluhun establese ona Sentru Informasaun Suku Dijital hodi fasilita informasaun ba komunidade sira.
“Hau sente kontente konaba ida ne’e, bele hafahe ou tutan informasaun ba komunidade tomak”, dehan Xefe Aldeia Sorumutu ba Dame
Tuir Emilia atu dezenvolve suku dijital presisa servisu hamutuk, fo’o hanoin ba malun no tenke suporta malun hodi desenvolve Sentru Informasaun suku dijital ne’e sai diak liu tan.
Hakerek : Equipa Formador JPD DNDM SEKOMS
