OPINIAUN
PRESIZA DEZENVOLVE SEITOR DESPORTU
Suku Kulu-Hun maka area urbana importante ne’ebe besik ba sentru sidade no esratejiku iha Postu Administrativu Cristo-Rei, Munisipiu Dili, Timor-Leste, ho númeru populasaun maiz-umenus Rihun Sanulo Atus Tolu Sanulo Resin Ida (10.311), kompostu husi Aldeia Hitu maka hanesan Aldeia Funu – Hotu, Aldeia Lao – Rai / Caregatiro, Aldeia Loe – Laco, Aldeia Nato, Aldeia Sorumutu ba Dame, Aldeia Tane – Mutu, no Aldeia Toko Baru II, tuir dadus foun Suco nian tinan 2025.
Bazeia ba dadus númeru populasaun iha Suku Kulu-Hun ho total rihun sanulo atus tolu resin, ne’e hatudu katak kada tinan numeiru joventude feto no mane aumenta ba beibeik ho ida-idak ninia talentu iha area oin-oin.
Desportu iha papél krusiál ba joventude iha Timor-Leste hodi hametin saúde fíziku no mentál, kria unidade nasionál, no hamenus violénsia. Liuhusi desportu, joven sira dezenvolve talentu, disiplina, no patriotizmu, inklui transforma grupu arte marsiál / rituál ba atividade ne’ebé produtivu no pasífiku. Liu husi desportu bele dezenvolve saúde katak fasilita kondisaun fíziku di’ak no mentalidade saudável. Desportu sai mekanismu ida atu prevene konflitu entre juventude, hanesan transfere enerjia husi violénsia ba kompetisaun saudável. Promove unidade, amizade, no solidariedade, liu husi eventu boot sira.
Nune’e mos liu husi desportu bele fasilita asisténsia ba joven feto no mane atu dezenvolve sira-nia talentu no kapasidade lideransa no promove profisionalizasaun desportu nian hodi prepara timoroan sira ba kompetisaun internasionál.
Tanba ne’e maka iha tinan hirak liu-ba bainhira realiza eventu balun hodi selebra loron Nasional, joventude Suco Culu-Hun hetan apoiu husi Ministeriu Joventude Desportu Arte no Cultura (MJDAC) hodi realiza atividades desportu nian maka hanesan football, Volly ball, dada tali, halai karon no atividades sira seluk tan.
Liu husi atividades hirak ne’e, ita bele haree katak joven feto no mane barak iha antusiasmu boot atu partisipa iha atividades desportu, hodi halo eventu sira sai moris no animadu iha Suku laran. Ida ne’e hatudu momós katak ita nia joventude barak iha talentu iha área desportu. Maibé, iha tempu hanesan, mosu problema ida, ne’ebé falta fasilidade no kondisaun ne’ebé apropriadu atu apoiu no dezenvolve sira nia kapasidade. Tanba ne’e, iha Suco Culu-Hun, ita bele dehan katak joven sira riku iha talentu desportu, maibé kiak iha fasilidade atu suporta no promove sira nia poténsia.
Pergunta maka ne’e: saida maka ita bele halo hodi desenvolve talentu joventude sira nian iha Suco Culu-Hun ba iha futuru? Resposta la’ós simples de’it, maibé presiza kolaborasaun husi parte hotu-hotu. Primeiru, autoridade lokal sira tenke fó atensaun liu ba dezenvolvimentu desportu, liu husi harii no hadia fasilidade hanesan kampu joga, ekipamentu no espasu adekuadu ba treinamentu. Segundu, importante atu organiza programa formasaun no kompetisaun regulár sira, atu bele hasa’e kapasidade no motiva joven sira atu kontinua dezenvolve sira nia talentu.
Liu tan, papel komunidade no família mos importante tebes atu fó apoiu morál no enkorajamentu ba sira nia oan sira, atu la abandona sira nia interese iha desportu. La haluha mos papel governu no parseiru sira atu investe iha área ne’e, hodi kria oportunidade ba joventude atu sai atleta ne’ebé kompetente iha nivel lokal no nasional.
Ho esforsu hamutuk, ita bele transforma Suco Culu-Hun sai fatin ida ne’ebé la’ós de’it riku iha talentu, maibé mos riku iha fasilidade no oportunidade, hodi prepara ita nia joventude sira atu hasoru futuru ho konfiansa no susesu.
Hakerek : Equipa Formado Sentru Informasaun dijital Suco Kuluhun
Editor : Formador JPD DNDM SEKOMS
