KULUHUN (14 ABRIL 2026) – Maske governu liu husi Autoridade Munisipiu Dili prepara ona lixeiro ba lixo maibe to’o oras ne’e sei iha komunidade balun maka sei kontinua soe lixo arbiru.
Joaninha Monteiro Lay, komunidade ida husi Aldeia Toko Baru II ba Sentru Informasaun Suku Dijital Kuluhun, Tersa feira semana ne’e (14/4/2026) iha nia hela fatin hateten durante ne’e iha komunidade balun maka soe foer arbiru maske fatin lixu nian prepara tiha ona.
“Ami hanesan komunidade ne’ebe hela besik fatin lexeiru nian, hare’e katak sei iha komunidade balun ne’ebe mai soe foer la ba iha lixo fatin, maske fatin lixo nian sei mamuk, dalaruma mos soe animal ne’ebe mate hanesan asu, busa no la-ho, ida ne’e lori i’is ne’ebe la fresku mai ami ne’ebe hela besik iha fatin ne’e”. Tenik Joaninha
Nia hatutan wainhira soe lixo arbiru bele hamosu moras oin-oin ba ema nia saude liu-liu ba labarik kiik sira, hanesan moras dengue.
“Hanesan ita hatene katak oras ne’e dadaun moras dengue sa’e maka’as iha ita nia rain ho pursentu ne’ebe bo’ot no ida ne’e ami tauk tanba bele lori moras ba ami nia a’an no ami nia oan sira”. Dehan Joaninha
Iha sorin seluk Sefi Aldeia Toko Baru II, Apolinario Barreto Caldeira hateten tuir informasaun ne’ebe maka komunidade sira hato’o katak lixo ne’ebe soe arbiru iha parte Escola SD MUI no 4 Kuluhun no loja Cina Plaza Y & W nia oin maske parte Autoridade local hato’o ona informasaun maibe sei kontinua akontese.
“Ami avisa ona ba komunidade sira katak bainhira soe foer tenke soe iha lixo fatin ne’ebe maka parte munisipiu Dili prepara ona labele soe arbiru”, dehan Apolinario.
Sefi Aldeia Toko Baru II ne’e hatutan bainhira komunidade sira soe foer arbiru maka parte munisipiu Dili sei foti hikas fatin lixo nian no ida ne’e sei fo’o impkatu ba komunidade sira.
Hakerek: Equipa Formando Suco Dijital Kuluhun
Editor: Formador JPD DNDM SEKOMS
